Pushteti do ta ketë të vështirë të miratojë ligje në Kuvend, edhe kur nevojiten vetëm 61 vota, vlerësojnë monitorues të punës së Kuvendit.

Abstenimi i deputetit të Nismës për të votuar Qeverinë Haradinaj, ka zvogëluar në 60 numrin e deputetëve të koalicionit qeverisës. Madje, deputeti i Nismës Zafir Berisha ka bërë të qartë se pas 100 ditë qeverisjeje të Haradinajt, do të votojë për rrëzimin e saj.

Qeveria e udhëhequr nga Ramush Haradinaj nuk do të mund të llogarisë në votën e deputetit të Nismës Zafir Berisha në Kuvend.

Deputeti Berisha thotë se do t’i japë kohë 100 ditë qeverisë Haradinaj dhe nëse nuk tregohet efikase, do të votojë për rrëzimin e saj.

Për monitoruesin e punës së Kuvendit, Valmir Ismajli, pushteti do të përballet me opozitë të fortë në Kuvend, Vetëvendosjen dhe LDK-në, raporton KTV.

Thotë se pushteti do ta ketë të vështirë të miratojë ligje në Kuvend, edhe kur nevojiten vetëm 61 vota.

AKR-ja, që u bë pjesë e koalicionit qeverisës, kishte fituar 4 deputetë, por ky subjekt tashmë në Kuvend është i përfaqësuar me vetëm dy deputetë.

Behgjet Pacolli, me t’u bërë pjesë e qeverisë, vendin e tij të deputetit ia ka lëshuar deputetit të LDK-së Imet Rrahmani, ndërsa Korab Sejdiu dha dorëheqje nga ky subjekt, për të vazhduar si deputet i pavarur.

KQZ-ja ka zyrtarizuar deputetët e rinj që do t’i zëvendësojnë deputetët që u bënë pjesë e qeverisë.

Nait Hasani e zëvendëson kryeministrin Ramush Haradinaj, Fadil Beka në vend të zëvendëskryeministrit Fatmir Limaj, Enver Hoti në vend të zëvendëskryeministrit Enver Hoxhaj, Gani Dreshaj e zëvendëson Rrustem Berishën, Bekë Berisha e zëvendëson Pal Lekajn dhe Brahim Shabani e zëvendëson Rasim Demirin.